U Risvigghiu du Carrumattu

‘Nto ’n vecchiu magazzinu di campagna
a mmenzu a sporti, bummula e zappuni,
c’era tutti mmucciatu un carrumattu.
Na notti, pi putiri d’un fuddittu
sulu sulittu si misi a parrari:
“iavi cent’anni chi sugnu ittatu
cca, ‘nta na gnuni, nuddu chiù mi varda;
eppuru mi ricordu la ma storia
di quannu pani iancu non ci ‘nnera
e i poviri ddumaunu a lumera,
io eppi a me parentesi di gloria.
Io era u Tir, u trasportu spiciali.
Quannu u vapuri scaricava i casci
supra a banchina o davanti a Dugana,
io i trasportava pi tutta Missina
all’ordini di Donn’Antoni Jaci
e du patruni, don Lillu Buddaci.
Don Pippinu ca so parigghia i boi
bardati cu nastrini e cazzabubbi,
mi purtava n’te festi patrunali.
Giuncendu tavulazzi paru paru
era prontu a nchianari pu Tunnaru;
tuttu ddubbatu cu cuperti i sita,
io purtava la dota di la zita
tutta stinnuta, accussì u populami
putia vidiri i pizzi e li ricami.
Poi muriu u vecchiu e lu patruni novu,
canciannu i tempi, si ccattò u carrettu
poi vinni a Lapa, appressu u motucarru
appressu ancora vinni u Leoncinu
poi l’autotrenu cu la cella frigu.
Certu, sapiri chi nu me parenti
è misu a bedda mustra permanenti
a Barcellona, ‘nto Museu Cassata,
fu comu na gran forti cutiddata.
U bummulu chi ‘ntisi stu me sfogu,
mi dissi mi mmi staiu rassignatu
chi sicuru finisciu camuliatu.
Na matina, però, setti cristiani
mi traspurtaru finu a Larderia
facennumi na grandi pulizia
e senza cchiù fulini e pulvirazzu
la veneranda età non mi paria.
Allura sbraitai pi cuntintizza:
Bummulu, mi cridivi rassegnatu
a finiri i me iorna camuliatu?
Bummulu hai statu e bummulu sarai
Leviti va, non mi pistari i caddi!
Mi risvigghiai! Sugnu a Forti Cavaddi!!!


Maria Morganti Privitera